Bandaríski bílaframleiðandinn Ford setur fljótlega nýja útgáfu af ofurbílnum Ford GT á markaðinn. Um er að ræða 700 hestafla bíl sem mun kosta 1,2 milljónir dollara eða rúmlega 150 milljónir íslenskra króna.

Þetta er engin smá upphæð fyrir bíl og þá kannski sérstaklega í ljósi þess að ekki má aka honum á almennum vegum heldur aðeins á sérhönnuðum brautum.

Væntanlega mun þó hvorki verðið né takmarkað notagildi bílsins halda aftur af vel fjáðum bílaáhugamönnum.

Samkvæmt frétt CNN mun nýja útgáfan heita Ford GT Mk II. Aðeins 45 bílar verða framleiddir. En það fær ekki hver sem er að kaupa þessa bíla því áhugasamir þurfa að sækja um að fá að kaupa þá og Ford þarf að samþykkja umsóknirnar.