Þessi baktería hefur að undanförnu sýkt marga á ströndum við austurströnd Bandaríkjanna. CBS News skýrir frá þessu. Bakterían, sem er skyld E-coli bakteríunni, étur hold og kemst inn í líkamann í gegnum opin sár.
Tyler King, sem starfar hjá vatnsíþróttafyrirtæki á Santa Rosa ströndinn í Flórída, smitaðist nýlega af þessari bakteríu. Í samtali við CBS News sagði hann að hann hafi ekki einu sinni verið í snertingu við sjó þegar hann fann vinstri upphandlegginn bólgna upp. Á aðeins nokkrum klukkustundum bólgnaði hann mikið og varð þrefaldur að stærð. Hann ákvað að fara til læknis og það sem betur fer.
„Ef ég hefði bara lagt mig hefði ég líklegast misst handlegginn.“
Hann sagðist ekki vita hvernig hann smitaðist.
Lynn Fleming, 77 ára, hafði lengi dreymt um að flytja til Flórída og fyrir nokkrum árum lét hún verða af því. Nýlega kom sonur hennar, Wade, í heimsókn ásamt fjölskyldu sinni. Ákveðið var að fara á Coquina ströndina.
Í samtali við CNN sagði Wade að þetta frí hafi verið bæði besta og versta frí sem hann hefur farið í. Móðir hans datt og fékk um tveggja sentimetra sár á annan fótlegginn. Strandvörður hreinsaði sárið og setti umbúðir á það. En sýkingin náði að hreiðra um sig og Lynn lést tveimur vikum síðar. Þetta var annað dauðsfallið af völdum þessarar hættulegu bakteríu á einum mánuði á strönd í Flóría.
Bandaríska smitsjúkdómastofnunin CDC segir að um 80.000 manns smitist af þessari hættulegu bakteríu árlega og um 100 látist.