Aldrei hafa verið gerðar fleiri skotárásir í bandarískum skólum en á síðasta ári.  Þetta og álíka voðaverk á undanförnum árum valda því að kennarar í Utah eyða nú sumarfríinu sínu í að æfa sig í meðferð og notkun skotvopna. Þeir eiga að geta brugðist við skotárásum með þessu.

Á laugardaginn mættu 30 kennarar á skotæfingasvæði lögreglunnar í miðju ríkinu til að hefja fjögurra vikna langt námskeið í notkun skotvopna. Kennararnir munu læra að hlaða skotvopn, miða og skjóta og hæfa skotmörk. Þeir fá einnig þjálfun í að leysa deilur, sjálfsvörn og hvernig á að hlú að særðum.

AP hefur eftir Christy Belt, kennara í fimmta bekk, að hún sæki námskeiðið vegna þeirra mannskæðu skotárása sem hafa verið gerðar á undanförnum árum. Hún vilji geta brugðist við ef skotárás verður gerð í skólanum hennar.

„Það er ekki þannig að ég eigi að leika Rambo og vernda allan skólann en það er gott að ég geti verndað börnin í bekknum mínum þannig að þau verði ekki fórnarlömb. Ég vona líka að þjálfun okkar komi í veg fyrir að fólk komi inn í skólana og skjóti börnin okkar. Það má segja að við vonum það besta en búum okkur undir það versta.“

Á síðasta ári voru 94 skotárásir gerðar í bandarískum skólum en það er 60% aukning frá árinu 2006 sem var metár þar til á síðasta ári.