Ef þú hefur gaman af því að leika þér í vatni og hefur gaman af LEGO-kubbum, þá eru þetta góðar fréttir fyrir þig.  Á næsta ári verður fyrsti LEGO-vatnsskemmtigarður í Evrópu opnaður á sérstöku svæði í stærsta skemmtigarði Ítalíu, Gardalandi. Þetta verður líka í fyrsta sinn sem LEGO-vatnsskemmtigarður verður opnaður í skemmtigarði sem ekki er LEGO-skemmtigarður.

Gardaland segir frá þessu í fréttatilkynningu. Lítið er um upplýsingar frá Gardalandi um það, hverju gestir nýja vatnsskemmtigarðsins mega búast við, eða hvaða tæki verða í garðinum. Gardaland upplýsir þó að opinbert nafn garðsins verði „LEGOLAND Water Park“ og að markhópur hans verði fjölskyldur með börn á aldrinum tveggja til tólf ára. Einnig hefur verið upplýst að gildi LEGO, „skemmtilegur leikur, hugmyndaflug, sköpunargáfa, nám, umhyggja og gæði“, verði í hávegum höfð í hinum nýja garði.

Áfangastaður ferðamanna

Forsvarsmenn Gardalands hlakka til þess að LEGO-merkið verði hluti af hinum ítalska skemmtigarði. Þar vonast menn til þess að hið heimsþekkta LEGO-merki muni stykja stöðu Gardalands sem aðlaðandi ferðamannastaðar.

Talsmenn Ítalíudeildar LEGO segja þetta frábærar fréttir. „Við erum mjög stolt og ég er viss um það að garðurinn muni gleðja bæði stóra og smáa LEGO byggingameistara“, segir Paolo Lazzarin forstjóri LEGO á Ítalíu.

Í dag eru LEGO vatnsskemmtigarðar í Legolandi á Flórída og í Legolandi í Dubai.