Norska lögreglan vinnur enn hörðum höndum að rannsókn á hvarfi Anne-Elisabeth Hagen sem hvarf í lok október á síðasta ári. Þá hvarf hún af heimili sínu og eiginmannsins, Tom Hagen. Hjónin eru meðal ríkustu Norðmannanna og eru eignir þeirra taldar í milljörðum. Lengi var talið að henni hefði verið rænt því kröfur um lausnargjald voru settar fram á miðum sem fundust á heimilinu eftir hvarf hennar. Nýlega skýrði norska lögreglan frá því að hún teldi að mannránið hefði verið yfirvarp og að Anne-Elisabeth hefði verið ráðinn bani.

Enn er þó ekki vitað nákvæmlega hvað gerðist eða hver eða hverjir voru að verki. Dagbladet reyndi að fá Tommy Brøske, sem stýrir rannsókninni, til að svara hvort lögreglan telji að Anne-Elisabeth hafi verið myrt á heimili sínu eða utan þess en því vildi hann ekki svara.

Hann lagði þó áherslu á að svarið við þessu gæti verið að finna í húsi þeirra hjóna. Hann sagði enga spurningu að lögreglan hafi mikinn áhuga á húsinu en hann vilji ekki tjá sig frekar um þann áhuga. Það sé markmið lögreglunnar að leysa málið og enn sé unnið á fullu að rannsókn þess.

1.700 ábendingar hafa borist í málinu og 400 manns hafa verið yfirheyrðir. Umfangsmiklar tæknirannsóknir hafa verið gerðar og upptökur úr ótal eftirlitsmyndavélum hafa verið skoðaðar. En þetta hefur ekki skilað lögreglunni miklu.