Bresk stjórnvöld vöruðu í dag við siglingum um Hormuz-sund eftir að Íranar reyndu í gær að hindra för bresks olíuskips sem fór þar um. Að sögn breska varnarmálaráðuneytisins reyndu þrír íranskir bátar að stöðva olíuskipið, en hörfuðu þegar breska herskipið HMS Montrose skarst í leikinn.

Í tilkynningu bresku stjórnarinnar eru írönsk stjórnvöld hvött til að draga úr spennunni sem er á svæðinu, en fúkyrði hafa gengið á milli stjórnvalda í Teheran og Bandaríkjamanna undanfarna daga, þar sem þetta er ekki fyrsta tilvikið þar sem Íranar reyna að stöðva skip sem sigla undir vestrænum fána. Með þessu háttalagi hafi Íranar brotið gegn alþjóðalögum og atvik sem þessi séu litin mjög alvarlegum augum.

Íranar hafa vísað ásökunum Breta á bug og segja ekkert hæft í þeim.