Það eru margir sem vita ekki að Færeyjar eru til og ef eyjarnar eru gúglaðar birtast mörg landakort þar sem þær eru ekki einu sinni. Hjá Visit Faroe Islands vildi fólk gera eitthvað við þessu sagði Susanna Sørensen í samtali við Norska ríkisútvarpið.
Í Færeyjum eru næstum tvöfalt fleiri kindur en fólk og þetta ákváðu heimamenn að nýta sér. Þeir festu einfaldlega myndavélar á kindur og létu þær ráfa um eins og þær gera alla jafna. Myndavélarnar voru knúnar af sólarrafhlöðum og því þurfti ekkert að huga að þeim eftir að búið var að festa þær á kindurnar.
Það kom aðstandendum verkefnisins helst á óvart að kindurnar hreyfa sig eiginlega ekki svo mikið. Þær eru mikið kyrrar á sama stað til að éta gras. Annar vandi var að það þurfti að fá þær aftur til manna til að fá upptökurnar úr vélunum.
Til að leysa hreyfivandann voru fjárhundar látnir stökkva kindunum á hlaup til að upptöku fengust af einhverju öðru en sama grasblettinum. Hundarnir sóttu síðan kindurnar og komu með heim til að hægt væri að fá myndirnar og setja þær inn á kortin hjá Google.
Þetta dugði til að vekja athygli Google og dag einn hringdi starfsmaður þaðan í Susanna og tilkynnti að fyrirtækið hefði heyrt af þessari baráttu Færeyinga og hefði ákveðið að bregðast við og senda myndavélabíl til eyjanna.
Framtak hinna snöllu ættingja okkar í Færeyjum skilaði því tilætluðum árangri og Google brást við eins og vonast hafði verið til.