Maðurinn var fundinn sekur um að hafa numið stúlkuna á brott í Vinderup síðasta sumar og að hafa síðan nauðgað henni á mannlausu svæði í Mors.
Samkvæmt frétt Danska ríkisútvarpsins lokkaði maðurinn stúlkuna inn í bílinn við Vinderup og ók síðan með hana til Mors.
„Ef þú gerir eins og ég segi hittir þú mömmu þína aftur. En ef þú gerir ekki eins og ég segi hittir þú hana ekki aftur.“
Sagði hann við stúlkuna samkvæmt ákæruskjali. Hann er einnig sagður hafa spurt stúlkuna hvort hún þekkti einhverja fullorðna sem vildu stunda kynlíf með börnum.
Maðurinn hefur alla tíð neitað sök en játar að hafa tekið stúlkuna upp í bílinn við Vinderup. Hún hafði staðið í vegkantinum og virst döpur og því hafi hann tekið hana upp í og ekið henni heim. Annað hafi ekki gerst.
Hann hefur áður hlotið dóm fyrir að nauðga barnungri stúlku. Á þeim grundvelli lagði réttarlæknaráði til að hann yrði dæmdur til ótímabundinnar vistunar í fangelsi.
Fyrir dómi sagði Pia Koudahl, saksóknari, að ótímabundin vistun væri eina leiðin til að tryggja að maðurinn verði ekki látinn laus á meðan hann er enn hættulegur. Ef hann fengi tímabundinn dóm gæti hann bara beðið eftir að verða látinn laus á nýjan leik.
Þegar dómurinn var kveðinn upp sagði dómsforsetinn í fjölskipuðum dóminum að framburður stúlkunnar væri trúverðugur en það sama væri ekki hægt að segja um framburð mannsins.
„Til að koma beint að kjarna málsins þá komumst við að þeirri niðurstöðu að þú sért svo hættulegur að það eigi ekki að hleypa þér út í samfélagið.“
Sagði dómsformaðurinn þegar hann talaði til mannsins.
