Þann 7. apríl 1989 sökk rússneski kjarnorkukafbáturinn Komsomolets nærri Bjarnareyju í Barentshafi. 42 fórust í slysinu en 27 komust lífs af. Kafbáturinn liggur á um 1.700 metra dýpi. Eldur kom upp í honum og breiddist hann hratt út og varð til þess að báturinn sökk á endanum. Áður en áhöfnin yfirgaf kafbátinn tókst henni að slökkva á kjarnakljúfi hans. Ef það hefði ekki tekist hefðu afleiðingarnar orðið skelfilegar fyrir Noreg.

Þetta sagði Aleksander Kozjanov í samtali við TV2. Hann var í áhöfn kafbátsins. Hann sagði að líklegast hefði orðið kjarnorkusprenging ef ekki hefði tekist að slökkva á kjarnakljúfinu en það hefði haft í för með sér mikla geislun, svo mikla að strendur Noregs væru sjálflýsandi í dag.

Geislavirk efni leka frá kafbátnum þar sem hann liggur á hafsbotni. Auk kjarnakljúfsins eru tvö kjarnorkutundurskeyti um borð í honum. Slík vopn áttu ekki aðeins að geta sökkt skipum heldur einnig gert út af við allt líf í margra kílómetra radíus.

Sérfræðingar telja ekki mikla hættu stafa af kafbátnum í dag. Hann liggi á miklu dýpi og geislavirknin frá honum eigi erfitt með að berast inn í vistkerfin á svæðinu. Þá stafi engin sprengihætta af kafbátnum.