Samhliða loftslagsbreytingunum og hlýnandi loftslagi leita sífellt fleiri ísbirnir inn í bæinn Kaktovik í norðurhluta Alaska í Bandaríkjunum. Chris Gordon, sem býr í bænum, hefur nú verið ákærður fyrir að hafa skotið ísbjörn og drepið í bænum. Þetta er óheimilt samkvæmt bandarískum lögum og á Gordin allt að eins árs fangelsi yfir höfði sér og 100.000 dollara sekt.

Gordon skaut ísbjörninn fyrir utan húsið sitt og lét hræ hans liggja þar í fimm mánuði að sögn saksóknara sem segir að Gordon hafi einnig skilið hvalkjöt eftir fyrir utan hús sitt um langa hríð og hafi það laðað ísbirni að.

Gordon, sem er 35 ára, hefur ekki viljað tjá sig um málið við fjölmiðla. Hann á að mæta fyrir dóm í Fairbanks í ágúst.

Samkvæmt bandarískum alríkislögum er heimilt að drepa ísbirni í sjálfsvörn en Gordon tilkynnti ekki um drápið eins og skylda er að gera. Þá mega þeir sem eru fæddir í Alaska drepa ísbirni til að viðhalda „lífsstíl“ sínum.