Ali Khamenei, sem er æðsti prestur Íran og þar með valdamesti maður landsins, sagði í gær að Bretar megi vænta þess að Íranir hefni þess að Bretar hafa tekið íranskt olíuskip í sína vörslu í Miðjarðarhafi.

Breskir hermenn hertóku skipið þann 4. júlí undan ströndum Gíbraltar og þar er það enn. Grunur leikur á að skipið hafi verið notað til að flytja olíu til Sýrlands en það brýtur gegn viðskiptabanni ESB gegn landinu.

Í sjónvarpsávarpi í gær sagði Khamenei að Bretar væru „illmenni“ sem hafi gerst sekir um sjórán og hafi stolið írönsku skipi.

„Íslamska lýðveldið mun svara þessum illgjörnu aðgerðum.“

Hann sagði þó ekkert nánar um hvað Íranar hyggjast gera. Þeir hafa þvertekið fyrir að skipið hafi verið á leið til Sýrlands. Skipið, sem getur borið tvær milljónir olíutunna, er fulllestað að sögn yfirvalda á Gíbraltar.