Í síðustu viku hófst málflutningur fyrir Evrópudómstólnum í máli sem austurríski aðgerðarsinninn Max Schrems höfðaði gegn Facebook. Dómstóllinn á að skera úr um hvort Facebook og evrópsk fyrirtæki, sem geyma persónuupplýsingar um notendur sína í Bandaríkjunum, brjóti gegn réttindum Evrópubúa.

Málið snýst um gagnaöryggissamninginn Privacy Shield sem Bandaríkin og ESB gerðu 2016. Samningurinn hefur síðan verið gagnrýndur af evrópsku persónuverndinni.

Schrems, sem er lögfræðingur, stefndi Facebook fyrir írskan dómstól vegna málsins þar sem höfuðstöðvar Facebook í Evrópu eru á Írlandi. Írski dómstóllinn taldi þó að Evrópudómstóllinn ætti að taka málið fyrir og sú varð raunin.

Niðurstaðan mun hafa áhrif á hvernig mörg hundruð þúsund evrópsk fyrirtæki geyma gögn utan Evrópu. Þessi gögn eru mikils virði fyrir fyrirtækin.