Við nálgumst óðfluga þann tímapunkt á Suðurskautinu að of seint verður að snúa þeirri þróun við sem á sér stað þar núna varðandi bráðnun jökla. Einn stærsti jökull heimsálfunnar, Thwaites-jökullinn, bráðnar nú hratt og allt stefnir í að bráðnunin muni verða enn hraðari á næstunni. Jökullinn er engin smásmíði því hann er á stærð við England.

Samkvæmt frétt The Guardian óttast vísindamenn að jafnvel þótt það takist að stöðva hnattræna hlýnun núna sé það of seint og ekki verði hægt að koma í veg fyrir að jökullinn bráðni. Þetta er byggt á niðurstöðum nýrrar rannsóknar sem bandaríska geimferðastofnunin NASA studdi við bakið á.

Ástand jökulsins er sagt vera orðið svo óstöðugt að líklega verði ekki hægt að stöðva bráðnun hans. Það vatn, sem losnar um við bráðnun hans, mun hækka yfirborð sjávar um allt að hálfan metra. En þessi jökull er ekki sá eini sem verður fyrir áhrifum af loftslagsbreytingunum því sömu örlög bíða annarra jökla á Suðurskautinu.