Úkraínska þingið samþykkti nýverið lög sem kveða á um að þeir sem eru fundnir sekir um barnaníð eða nauðganir skuli vanaðir með lyfjagjöf. Einnig verða fangelsisrefsingar vegna slíkra brota þyngdar og verður hámarksrefsing framvegis 15 ára fangelsi í stað 12 ára. Einnig verður byrjað að halda sérstaka skrá yfir dæmda kynferðisbrotamenn og fylgjast á með þeim eftir að þeir hafa afplánað refsingu sína.

The Independent skýrir frá þessu. Fram kemur að lögin nái til karlmanna á aldrinum 18 til 65 ára. Lögin voru samþykkt í kjölfar hræðilegs máls sem kom upp í júní. Þá fannst 11 ára stúlka myrt í bæ í suðurhluta landsins. Henni hafði verið nauðgað áður en hún var myrt. 22 ára fjölskylduvinur hefur játað að hafa verið að verki.

Málið kom af stað umræðum á úkraínska þinginu og voru þingmenn sammála um að aðeins sé vitað um lítinn hluta þeirra kynferðisbrota sem framin eru í landinu. Lögreglustjórar eru þessu sammála.

Mirror hefur eftir Vyacheslav Abroskin, ríkislögreglustjóra, að á aðeins einum sólarhring hafi fimm börnum verið nauðgað í fjórum héruðum landsins. Foreldrar barnanna hafi tilkynnt um þetta í öllum tilvikum. Aðeins sé hægt að giska á hversu mörg svona óhæfuverk séu framin og aldrei tilkynnt um til lögreglunnar.

Samkvæmt opinberum tölum var tilkynnt um 320 kynferðisbrot í Úkraínu 2017.