Joe Kaeser, forstjóri Siemens, segir í færslu á Twitter að Donald Trump, Bandaríkjaforseti, sé orðinn táknmynd kynþáttahyggju og útskúfunar. Þetta skrifaði hann í kjölfar skrifa forsetans á Twitter um að nokkrar þingkonur demókrata ættu að „fara heim til landsins sem þær komu frá“.

Bloomberg skýrir frá þessu. Nú hefur Kaeser fengið nóg og svarað Trump fullum hálsi á Twitter. Þar segir hann að það sé niðurdrepandi að „andlit mikilvægasta pólitíska embættis heimsins sé orðið andlit rasisma og útskúfunar“.

„Ég hef búið í Bandaríkjunum í mörg ár og kynnst frelsi, umburðarlyndi og hreinskilni.“

Kaeser var áður yfirmaður Siemens í Kaliforníu.

Þetta er ekki í fyrsta sinn sem Kaeser lætur pólitísk málefni til sín taka. Í október á síðasta ári hætti hann við þátttöku á stórri ráðstefnu í Sádí-Arabíu í kjölfar morðsins á blaðamanninum Jamal Khashoggi.

„Sannleikurinn þarf að koma í ljós og réttlætið þarf að ná fram að ganga.“

Skrifaði hann þá á Twitter.