Það var þann 28. nóvember 2009 sem Larry kom í heimsókn til foreldra sinna í Council Bluffs í Iowa í Bandaríkjunum. Það var í síðasta sinn sem þau sáu hann á lífi. CNN skýrir frá þessu.
Foreldrar hans sögðu lögreglunni að Larry hefði verið farinn að hegða sér mjög undarlega, líklega af völdum lyfs sem hann tók á þessum tíma. Þegar hann hljóp frá foreldrum sínum var hann eiginlega ekki með neitt meðferðis að sögn Brandon Danielson hjá lögreglunni í Council Bluffs. Veðrið var einnig mjög slæmt þennan dag, hríðarbylur og Larry var skó- og sokkalaus.
Mikil leit var gerð að honum en án árangurs. Ekkert fannst sem gat leitt lögregluna á slóð Larry fyrr en um miðjan janúar á þessu ári. Þá byrjuðu iðnaðarmenn að fjarlægja hillur og frysta í matvöruversluninni No Frills í bænum en hún hafði þá verið lokuð í þrjú ár. Bak við einn frystinn fundu þeir lík.
Á mánudaginn fékkst síðan loks staðfest að líkið væri af Larry.
Krufning leiddi í ljós að engin merki voru um að eitthvað saknæmt hefði átt sér stað. Lögreglan telur því að um hörmulegt slys hafi verið að ræða. Kenning hennar er að eftir að Larry hljóp frá foreldrum sínum hafi hann farið í verslunina, en þar starfaði hann, þrátt fyrir að hann hafi ekki átt að vinna þennan dag. Hann virðist síðan hafa ákveðið að klifra yfir frystana til að komast í geymslurými sem starfsfólkið notað oft til að taka sér pásur í. Þegar hann stóð ofan á frystunum datt hann líklegast nokkra metra niður í bil á milli frystanna og veggsins og festist þar. Hávaðinn frá frystunum hefur líklega yfirgnæft hann þannig að enginn heyrði í honum ef hann hefur þá kallað á hjálp.