Bæjaryfirvöld í Eskilstuna í Svíþjóð reyna nú að ná tökum á betli í bænum. Reglur hafa verið settar um að betlarar verði að skrá sig hjá sveitarfélaginu og greiða sérstakt gjald áður en þeir byrja að betla innan bæjarmarkanna.

Reglurnar tóku gildi í byrjun mánaðarins. Talið er að 30 til 50 betlarar, aðallega frá Austur-Evrópu, lifi af betli í bænum. Aðgerðir bæjaryfirvalda koma í kjölfar umræðu í Svíþjóð um hvernig eigi að taka á málum þess mikla fjölda fólks sem kemur frá Austur-Evrópu til að betla og safna flöskum.

Sektir liggja við brotum á þessum nýju reglum.