Það tók vísindamenn 41 ár að finna nýja risaeðlutegund sem blasti við þeim allan þennan tíma. Risaeðlan fannst 1978 og var þá talin vera af tegundinni Massopondylus. En nú hafa vísindamenn við náttúrugripasafnið í Lundúnum og Witwatersrand háskólann í Suður-Afríku rannsakað beinin á nýjan leik og komist að því að þau eru úr áður óþekktri tegund. Beinin voru til sýnis á safni í Suður-Afríku.

Paul Barret, einn vísindamannanna, segir á heimasíðu náttúrugripasafnsins að margir vísindamenn hafi rannsakað beinin í gegnum tíðina og talið að um óvenjulegt dýr af Massopondylus hafi verið að ræða en sú tegund er velþekkt í Suður-Afríku.

Kimberley Chapelle, sem einnig kom að rannsókninni, hefur sérhæft sig í Massopondylus tegundinni og taldi að beinin væru frábrugðin beinum dýra af þeirri tegund á marga vegu. Þannig komust vísindamennirnir á sporið sagði Barrett í samtali við CNN.

Nýja tegundin hefur fengið nafnið Ngewevu intloko sem þýðir grá höfuðkúpa. Nafnið er sótt í tungumálið Xhosa sem er eitt þeirra tungumála sem eru töluð í Suður-Afríku. Risaeðlan er talin hafa verið um þrír metrar á lengd, með langan háls, feitlaginn og alæta.