Síðasta föstudagskvöld fannst Peter Plax, 16 ára, helsærður í Sollentuna í Stokkhólmi. Hann var með mikla áverka á höfði og baki. Hann var strax fluttur á sjúkrahús með þyrlu en lést aðfaranótt laugardags af völdum áverkanna. Grunur leikur á að þeir hafi verið veittir með öxi. Annar piltur hefur verið handtekinn, grunaður um að hafa orðið Peter að bana.

Expressen skýrir frá þessu. blaðið hefur eftir foreldrum Peter, Dmitri Plax og Olga Teouch, að Peter hafi verið bráðgreindur og hafi elskað að spila á píanó, hafi dreymt um að verða sálfræðingur og hafi aldrei lent í neinum vandræðum.

„Peter var eins langt frá afbrotum og hægt er. Hann var heimsins besti piltur. Hann var alltaf glaður og í góðu skapi. Hann var alltaf reiðubúinn til að hjálpa öðrum. Hann var mjög vinsæll.“

Sagði faðir hans um Peter sem átti að hefja menntaskólanám 19. ágúst næstkomandi. Móðir hans tók í sama streng og sagði að Peter hafi verið vinsæll meðal vina sinna og vel gefinn.

Talið er að það hafi verið hinn handtekni sem tilkynnti lögreglunni um málið. Lögreglan hefur ekki viljað veita neinar upplýsingar um ástæðu morðsins eða hvað hinn handtekni hefur sagt við yfirheyrslur.