Samkvæmt umfjöllun USA Today þá er vopnalöggjöfin í Texas ein sú frjálslegasta í Bandaríkjunum. Samkvæmt henni geta allir sem hafa náð 18 ára aldri eignast skotvopn. Ef fólk er með skotvopnaleyfi má það bera skotvopn í skólum og verslunum sem heimila það. Til að fá skotvopnaleyfi er nóg að taka námskeið á netinu og skotpróf í framhaldi af því.
Texas er í raun svokallað „open carry state“ en það þýðir að fólk má vera vopnað, þar með talið þungvopnað, þegar það fer í verslunarmiðstöðvar, kirkju eða er annarsstaðar á opinberum vettvangi. Í raun er ólöglegt að hindra fólk í að bera vopn.
Ef skotvopn er keypt í verslun þarf fólk að standast svokallaða bakgrunnsskoðun en ef notað vopn er keypt af einkaaðila þarf þessi ekki segir á heimasíðu NRA sem eru hagsmunasamtök þeirra sem aðhyllast frjálsa og óhefta skotvopnaeign.
Í kjölfar voðaverksins í El Paso hafa margir þeirra demókrata, sem sækjast eftir að verða forsetaframbjóðendur flokksins, veist harkalega að NRA og bandamönnum þeirra í repúblikanaflokknum.
Cory Booker, þingmaður í New Jersey, sagðist hafa fengið nóg og í næstu forsetakosningum verði frambjóðendur að þora að segja að það megi ekki láta hagsmuni skotvopnaiðnaðarins og þar með NRA ráða.
Í einhverskonar stefnuyfirlýsingu sem ódæðismaðurinn í El Paso birti skömmu áður en hann lét til skara skríða kemur fram að hann sé hræddur við að fólk frá Latnesku-Ameríku sé að taka Texas yfir og að hvítir verði þar fljótlega í minnihluta. Hann hafi viljað leggja sitt af mörkum til að koma í veg fyrir það.
Beto O‘Rourke, sem einnig býður sig fram í forvali demókrata, sagði í kjölfar voðaverksins að orðræða Donald Trump, forseta, um innflytjendur frá Suður-Ameríku geti leitt til atburða eins og í El Paso. Trump hefur ítrekað sagt að innflytjendurnir ógni öryggi Bandaríkjanna.
„Auk þess að breyta lögum, svo svona lagað gerist síður, verðum við að tala um hatrið og kynþáttahyggjuna sem sést hér í landinu núna og getur leitt til þess að svona gerist.“
Sagði O‘Rourke sem fæddist í El Paso og sat í borgarstjórn þar frá 2005 til 2011.