Þann 31. október á síðasta ári hvarf Anne-Elisabeth Hagen af heimili sínu í útjaðri Osló í Noregi. Allt bendir til að hún hafi verið numin á brott en miðar, með kröfu um lausnargjald, voru skildir eftir í húsinu. Lögreglan rannsakaði málið lengi sem mannrán en hefur nú beint rannsókninni í annan farveg og rannsakar málið sem morðmál því hún telur litlar líkur á að Anne-Elisabeth sé á lífi.

Í sama streng tekur Gregg McCrary, fyrrum sérfræðingur hjá bandarísku alríkislögreglunni FBI. Hann telur mjög ólíklegt að hún sé enn á lífi og það þrátt fyrir síðustu tilkynningu frá fjölskyldu Anne-Elisabeth. Nýlega kom fram að í byrjun júlí hafi fjölskyldan verið í sambandi við meinta mannræningja sem kröfðust 10 milljóna norskra króna frá fjölskyldunni fyrir að sanna að hún væri enn á lífi. Fjölskyldan greiddi upphæðina en hefur ekkert heyrt síðan frá hinum meintu mannræningjum.

„Það er ólíklegt að hún sé enn á lífi. Ef maður hefur ekki afhent sannanir um að hún sé á lífi þá er mjög líklegt að hún sé það ekki. En það útilokar ekki að henni hafi verið rænt.“

Sagði McCrary í samtali við VG. Hann sagðist þó ekki vilja útiloka neitt því reynsla hans segi honum að allt geti enn gerst í málinu.

„Maður má ekki verða þröngsýnn og festa sig við eina kenningu. Maður verður að vera með margar kenningar, ekki er hægt að hunsa lausnargjaldskröfuna. Það er mjög skýr kenning en þegar hún skilar ekki árangri neyðist maður til að horfa á aðra möguleika.“

Fjölskylda Anne-Elisabeth er ósammála lögreglunni og telur að hún sé á lífi. Lögmaður fjölskyldunnar sagði í síðustu viku að það kæmi honum á óvart ef lögreglan útiloki að hún sé á lífi. Þetta sagði hann í kjölfar upplýsinga um að fjölskyldan hefði verið í sambandi við meinta mannræningja.