Natalie Christopher, 35 ára breskur stjarneðlisfræðingur, sem fannst látin á grísku eyjunni Ikaria á dögunum er talinn hafa látist eftir fall. Í fyrstu lék grunur á að Natalie hefði verið ráðinn bani.
Natalie hafði farið út að hlaupa að kvöldi 5. ágúst en skilaði sér ekki til baka. Tveimur dögum síðar fannst lík hennar í gljúfri.
Í fréttum grískra fjölmiðla kemur fram að höfuðáverkar hafi að líkindum dregið Natalie til bana. Engin merki hefðu verið um átök heldur benti flest til þess að hún hefði dottið aftur fyrir sig á umræddri hlaupaleið og fallið um tuttugu metra niður í umrætt gljúfur. Talið er að hún hafi jafnvel verið að reyna að komast upp á nokkuð háan klett þegar slysið varð.
Natalie var í fríi á Ikaria ásamt kærasta sínum og var það hann sem hafði samband við lögreglu eftir að hún skilaði sér ekki úr hlaupinu. Parið var búsett á Kýpur og hugðist það fljúga þangað daginn eftir, eða þann 6. ágúst.