Þann 1. september tekur ný vopnalöggjöf gildi í Texas. Þvert á það sem margir kunna að halda þá verður hún ekki hert en margir hafa krafist hertrar löggjafar í kjölfar fjöldamorðsins í El Paso nýlega en þar voru 22 skotnir til bana af hvítum þjóðernissinna. Nú verður löggjöfin rýmkuð og byssueigendum heimilað að bera vopn á skólalóðum og við kirkjur.

CNN skýrir frá þessu. Fram kemur að Kris Brown, hjá Brady samtökunum, gagnrýni þetta harðlega. Samtökin vinna að því að reyna að draga úr umfangi ofbeldisverka sem eru framin með skotvopnum. Hún segir að í öðrum ríkjum Bandaríkjanna hafi verið reynt að auka öryggi borgaranna eftir fjöldamorð sem þessi.

„Í staðinn fyrir að einblína á að halda vopnum frá hættulegu fólki eða tryggja enn öruggari geymslu vopna þá bregðast stjórnmálamenn í Texas við með því að styðja tillögu frá NRA (sem eru hagsmunasamtök vopnaiðnaðarins, innskot blaðamanns) um að leyfa vopn allsstaðar, óháð áhættunni og fórnarkostnaðinum.“

Sagði hún.

Nýju lögin kveða einnig á um að leigusölum verður óheimilt að banna leigjendum sínum að vera með skotvopn í leiguhúsnæðinu. Einnig verður heimilt að geyma skotvopn í læstum bílum á bílastæðum við skóla.

Lögin voru samþykkt áður en fjöldamorðin í El Paso voru framin þann 3. ágúst og í Dayton í Ohio daginn eftir en þá voru 10 myrtir.