Neil Basu, yfirmaður andhryðjuverkadeildarinnar, veitti The Guardian viðtal nýlega en afar sjaldgæft er að hann tjái sig við fjölmiðla. Hann sagði að ekki sé útlit fyrir að hættan minnki á næstunni og nú sé kominn tími til að endurmeta stefnu og aðgerðir Breta gegn hryðjuverkum. Það dugi ekki bara að bæta við mannaflann, bæta búnaðinn og veita lögreglunni meiri heimildir. Hann sagði að leggja verði meiri áherslu á félagslegu hliðina, til dæmis að aðlaga fólk að samfélaginu og hjálpa því að menntast þannig að það velji ekki hryðjuverk frekar en venjulegt líf.
Basu hefur stýrt deildinni síðan 2018. Hann sagði að forvarnarstarfið hafi ekki verið í nægilega góðum farvegi.
Mat sitt á hættunni byggir hann á þeim staðhæfingum að 80 prósent allra, sem munu fremja hryðjuverk í Bretlandi, búa í landinu og margir þeirra hafa alist þar upp. Aðgerðum andhryðjuverkasveitarinnar fjölgaði um 50 prósent á milli 2015 og 2017 og eru aðgerðirnar enn mjög margar. Á sama tíma hefur herskáum íslamistum og öfgahægrimönnum gengið vel að fá Breta til liðs við sig. Auk þess er hættumat yfirvalda nánast alltaf á næsthæsta stigi en það þýðir að talið er „mjög líklegt“ að hryðjuverk verði framið innan ekki svo langs tíma.
„Tölurnar segja okkur að við verðum að horfa dýpra niður í samfélagið. Af hverju treysta sumir ekki samfélaginu, af hverju mennta þeir sig ekki, af hverju verða sumir fyrir barðinu á kynþáttahyggju vegna húðlitar sína, af hverju hafa ekki allir sömu tækifæri, af hverju truflar lögreglan suma meira en aðra?“
Sagði Basu í viðtalinu og bætti við að hann teldi fyrrgreind atriði eiga mikinn þátt í að svo margir hugsanlegir hryðjuverkamenn eru í landinu.