Snemma að morgni í lok júlí var Aia Polansky, 33 ára, úti að skokka í Cambridge í Massachusetts í Bandaríkjunum. Hún var að koma sér í gang fyrir daginn en klukkan var rétt rúmlega sjö. Skyndilega stökk karlmaður fram, þegar hún var að skokka meðfram Charles River og Memorial Drive og hlustaði á hljóðbók eins og hún gerir venjulega. Maðurinn hljóp á móti henni og beraði kynfæri sín.
Aia hélt í fyrstu að henni hefði missýnst en maðurinn kom nær og þá var hún ekki lengur í neinum vafa. En maðurinn vissi ekki mikið um Aia og hefði væntanlega sleppt þessu ef hann hefði vitað meira um hana. Það sem hann vissi ekki er að hún var áður liðsmaður ísraelska hersins og er þrautþjálfuð og hafði ekki í hyggju að láta manninn sleppa frá þessu.
„Þetta var ekki happadagurinn hans. Ég ákvað að „láta þetta ekki gerast“ og hljóp á eftir honum. Ég öskraði á hann að ég myndi ná honum: „Ég næ þér elskan!“
Öskraði hún að sögn. Og hún stóð við þetta því hún elti hann og náði og lagði í jörðina. Þar hélt hún honum föstum í nokkrar mínútur og reyndi að hrópa á aðstoð vegfarenda í nágrenninu til að þeir myndu hringja í lögregluna. En enginn stoppaði til að aðstoða hana og á endanum neyddist hún til að losa takið á manninum til að hringja í lögregluna og þá tókst honum að flýja.
Í samtali við CBS sagðist hún hafa orðið fyrir miklum vonbrigðum með viðbrögð eða öllu heldur viðbragðsleysi vegfarenda.