Nýlega var hópur vísindamanna sendur upp meðfram Koyokuk ánni í Alaska í Bandaríkjunum eftir að tilkynnt hafði verið um mikinn laxadauða. Íbúar á svæðinu fundu að minnsta kosti 850 dauða laxa en talið er að þeir hafi verið tíu sinnum fleiri hið minnsta.

CNN skýrir frá þessu. Vísindamenn vissu í fyrstu ekki hvað hefði valdið þessu því ekki var að sjá að fiskarnir hefðu verið sýktir eða að sníkjudýr hefðu herjað á þá. Auk þess voru nær allir fiskarnir með hrogn í góðu standi inni í sér.

Vísindamenn eru enn ekki vissir um ástæður þessa mikla laxadauða en grunar að hinn mikli hiti sem hefur verið í Alaska í sumar eigi hér hlut að máli. Hitinn gerir að verkum að súrefnismagn í vatninu minnkar og því kafna fiskarnir.

Þá hafa vísindamenn einnig vakið athygli á að hiti hafi aldrei mælst hærri á þessu svæði en nú í sumar. Hitinn hafi verið svo mikill að hann hafi verið meiri en talið hefur verið að hann verði 2069 miðað við verstu afleiðingar hnattrænnar hlýnunnar.