Ítalska eyjan Sardinía er meðal annars þekkt fyrir kríthvítar sandstrendur sínar. Það sem margir ferðamenn vita ekki er að sandurinn telst almenningseign og að það er stranglega bannað að fjarlægja hann. BBC skýrir frá þessu.

Franska parið vissi þetta sennilega ekki, þegar þau voru stöðvuð af lögreglunni, þegar þau voru á leið um borð í ferjuna til Toulon í Frakklandi. Í bílnum fundust 14 plastflöskur, stútfullar af hvítum sandi, sem tekinn hafði verið af ströndinni í Chia, sem er á suðurströnd Sardiníu.

Íbúar eyjarinnar hafa lengi kvartað yfir sandstelandi ferðamönnum og síðan 2017 hefur það verið ólöglegt að fjarlægja sand frá ströndum eyjarinnar. Samkvæmt BBC gæti franska parið átt fyrir höfði sér sex ára fangelsisdóm fyrir sandþjófnaðinn.

Sandstrendurinar eru meðal þess sem dregur fólk til Sardiníu og er það tvennt sem ógnar þeim. Annars vegar er það veðrun, sem að hluta til er eðlileg og að hluta til vegna hækkunar sjávar. Hin ógnin er sandþjófnaður ferðamanna. Það er þó aðeins lítill hluti ferðamanna sem hefur fyrir því að taka 40 kíló af sandi með sér heim, en ef allir þeir milljón ferðamenn sem koma til eyjarinnar á ári hverju taka nokkur kíló af sandi með sér heim, hefur það fljótt áhrif á strendurnar.