Réttarhöld yfir Todd Barket, 51 árs karlmanni í Flórída, hefjast á næstu dögum. Barket er ákærður fyrir morð sem framið var árið 1998. Þá var 68 ára kona, Sondra Better, stungin til bana í fyrirtæki sem hún starfaði fyrir. Sondra var ein á vaktinni umrætt kvöld og leikur grunur á að um rán hafi verið að ræða.
Verksummerki bentu til þess að Sondra hafi varist árásarmanninum sem skildi eftir sig blóðslóð. Fingraför fundust á vettvangi og þá voru tekin blóðsýni, en engin samsvörun fannst í DNA-gagnabanka lögreglu á þeim tíma.
Það sem kom upp um Todd er sú staðreynd að hann sótti um vinnu á dvalarheimili fyrir aldraða á síðasta ári. Hann þurfti að láta væntanlegum vinnuveitendum í té fingraför sem send voru til lögreglu. Það var þá sem í ljós kom að Todd hafði verið á vettvangi morðsins árið 1998. DNA-rannsókn leiddi einnig í ljós að blóðið tilheyrði honum.
Lögregla ákærði Todd í kjölfarið en hann neitar sök í málinu. Todd bjó skammt frá staðnum þar sem Sondra var myrt og þá líkist hann manni sem sást á vettvangi skömmu fyrir morðið.
