Áætlað er að ferðir pílagríma til Mekka skili Sádí-Aröbum um 12 milljörðum dollara í tekjur árlega en um tvær milljónir pílagríma sækja landið heim árlega. En mikill vill meira og því hyggjast Sádí-Arabar reyna að fjölga pílagrímunum mikið. Nútímatækni á að hjálpa þeim við það.

Quartz skýrir frá þessu. Pílagrímsferðirnar eiga sér stað í fimm eða sex daga í síðasta mánuði íslamska dagatalsins. Slíkar ferðir eru skylda samkvæmt trúnni og því reyna margir múslimar að komast að minnsta kosti einu sinni til Mekka í lífinu.

Nú stefna Sádí-Arabar að því að geta tekið á móti um 30 milljónum pílagríma árlega fyrir 2030. Til að þetta verði hægt er nú fjárfest af miklum krafti í innviðum. Búið er að taka háhraðalest í notkun á milli Mekka og Medina en hún styttir ferðatímann um átta klukkustundir. Í Mekka er búið að koma upp öflugum eftirlitskerfum sem fylgjast með ferðamönnum og hvort einhverjir þarfnast aðstoðar. Þetta er gert í kjölfar fjölda dauðsfalla í tengslum við pílagrímaferðirnar. Fyrir fjórum árum krömdust að minnsta kosti 2.200 manns til bana í þrengslunum í Mekka.