Anwar Ghazali var í síðustu viku fundinn sekur um morð af annarri gráðu af kviðdómi í Memphis í Tennessee í Bandaríkjunum. Hann skaut 17 ára svartan pilt til bana eftir að hann hljóp út úr versluninni, þar sem Ghazali starfaði, með bjór sem hann greiddi ekki fyrir. Bjórinn kostaði tvo dollara.

„Hinn ákærði tók upp á því að eigin frumkvæði að vera vera dómari, kviðdómur og böðull vegna tveggja dollara bjórs.“

Sagði Lora Fowler saksóknari í samtali við WMC að réttarhöldum loknum.

Atburðurinn átti sér stað í mars 2018. Þá gekk Dorian Harris út úr Top Shop Shop með bjór sem hann hafði ekki greitt fyrir. Á upptökum úr eftirlitsmyndavélum sést Ghazali, sem var þá við afgreiðsluborðið, draga upp skammbyssu og miða á Harris sem hljóp út. Ghazali elti hann og skaut nokkrum sinnum á hann.

Hann fór því næst inn í verslunina og sagði við viðskiptavini: „Ég held að ég hafi skotið hann.“ Hann hringdi ekki í lögregluna og það gerði enginn viðskiptavinur heldur.

Harris varð fyrir þremur skotum og var skilinn eftir utanhúss þar sem honum blæddi út að sögn Fowler. Lík hans fannst tveimur dögum síðar í garði nærri versluninni.

Verjandi Ghazali sagði í samtali við CNN að skjólstæðingur hans hafi játað að hafa hegðað sér af miklu ábyrgðarleysi þetta kvöld en hafi ekki ætlað sér að skaða Harris.

Refsing Ghazali verður ákveðin þann 23. september næstkomandi. Þar sem hann var fundinn sekur um morð af annarri gráðu en ekki fyrstu verður hann ekki dæmdur í lífstíðarfangelsi en á samt sem áður þungan dóm yfir höfði sér.