DV skýrði frá málinu í gær en lögreglan taldi að um lík Ole Geir Hodne Viste, 36 ára, væri að ræða en hann hvarf á dularfullan hátt sumarið 2015. Niðurstöður dna-rannsóknarinnar staðfesta að það var lík Ole Geir sem var í veggnum.
Niðurstaða krufningar liggur ekki fyrir en lögreglan rannsakar málið sem „dularfullt mannslát“ og hefur biðlað til almennings um upplýsingar.
Húsið, sem Ole Geir, fannst í var mannlaust og hafði ekki verið notað um árabil. Iðnaðarmenn unnu að endurbótum á því þegar þeir fundu líkið inni í vegg sem þeir voru að rífa. Lögreglan segir að líkið hafi borið þess merki að hafa verið inni í veggnum í mörg ár.
Síðast er vitað um ferðir Ole Geir þann 16. júní 2015 en þá notaði farsími hans sendi í Sandnes. Um klukkustund síðar voru nær allir peningar hans teknir út af reikningi hans í hraðbanka í Stavangri.
Vitni hafa borið að þau hafi séð Ole Geir þennan dag og hafi hann þá verið með nokkra ruslapoka meðferðis og verið með manni sem var lægri en hann. Lögreglunni hefur ekki tekist að komast að hver sá maður er en telur líklegt að þar hafi verið kunningi Ole Geir úr hópi óreglufólks í Sandnes.
Klukkan 23.16 þann 16. júní 2015 var greiðslukort Ole Geir notað til að greiða fyrir leigu á geymsluhólfi á lestarstöðinni í Stavangri. Þegar hólfið var tæmt síðar var grænn poki í því með persónulegum munum Ole Geir.
Tvö vitni segjast hafa rætt við Ole Geir síðdegis þann 18. júní en lengra áleiðis hefur lögreglan ekki komist við að rekja ferðir hans.
