Sky skýrir frá þessu. Fram kemur að tæplega tveir þriðju af þeim 2.000 sem svöruðu hafi ekki getað sagt hversu margir gyðingar voru myrtir í Helförinni eða hafi vanmetið fjöldann mikið. Það var the Holocaust Memorial Day Trust (HMDT) sem stóð fyrir könnuninni.
Steven Frank, 83 ára, var meðal þeirra 93 barna sem lifðu af í Theresienstadt útrýmingarbúðunum í Tékkóslóvakíu. Sky hefur eftir honum að niðurstöður könnunarinnar séu „skelfilega rangar“. Hann sagðist vera „hissa“ á að einn af hverjum 20 trúi ekki að Helförin hafi átt sér stað.
„Það er mín reynsla að fólk skorti grundvallarskilning á hvað gerðist í Helförinni og það er ein ástæða þess að ég er svo staðráðinn í að deila því sem ég upplifði. Þegar ég hélt ræðu um þetta eitt sinn hitti ég mann sem sagði að Helförin hefði ekki átt sér stað. Eina leiðin til að berjast gegn afneitun sem þessari og gyðingahatri er að segja sannleikann – ég segi fólki hvað gerðist, hvað ég sá og hvað ég gekk í gegnum. Menntun er svo mikilvæg. Ef við hunsum fortíðina óttast ég að sagan muni endurtaka sig.“
Olivia Marks-Woldman, forstjóri HMDT, sagði að svona útbreidd fáfræði og jafnvel afneitun sé mikið áfall.