Í myndbandi segist maðurinn heitar Brenton Tarrant og vera frá Ástralíu. Hann sendi beint út á Facebook þegar hann skaut fólk til bana í annarri moskunni. Hann birti einnig stefnuyfirlýsingu í anda Anders Breivik áður en hann lét til skara skríða. Hún er 73 blaðsíður að lengd. Tarrant segist hafa verið í sambandi við Breivik og hafi notið stuðnings stuðningsmanna Breivik við undirbúning hryðjuverkanna.
Í stefnuyfirlýsingunni segir hann að hryðjuverkin séu hefnd fyrir hryðjuverk í Evrópu. Hann er greinilega undir áhrifum hægriöfgasinnaðra þjóðernissinna sem eru andsnúnir íslamstrú.
Hann hrósar Donald Trump, Bandaríkjaforseta og segir hann tákn fyrir endurnýjun sjálfsmyndar hvítra. Hann skrifar einnig mikið um nauðganir karla af pakistönskum uppruna á hvítum stúlkum í Bretlandi og vísar einnig til serbneskra þjóðernissinna. Sydney Morning Herald segir skrif hans greinilega undir áhrifum frá Breivik. Paul Buchanan, öryggissérfræðingur, segir augljóst að Tarrant sé hvítur þjóðernissinni. Hann sagði ólíklegt að hann hafi verið einn að verki.