Frásagnir starfsmanna af erfiðum vinnuaðstæðum í vöruhúsum Amazon hafa reglulega komið fram í dagsljósið á undanförnum árum. Starfsmenn sem taka til pantanir fyrir viðskiptavini eru margir undir miklu álagi og þurfa að uppfylla allskonar kröfur til að vera álitnir góðir starfsmenn.
Daily Beast kafaði ofan í málið á dögunum og komst að því að frá október 2013 til október 2018 hafi bandarísku neyðarlínunni borist 189 símtöl úr vöruhúsum fyrirtækisins frá starfsmönnum. Símtölin voru býsna óhugnanleg og vörðuðu meðal annars sjálfsvígstilraunir, sjálfsvígshugsanir og andleg veikindi starfsfólks.
Tekið er fram í umfjöllun Daily Beast að úttekt blaðsins hafi aðeins náð til 46 vöruhúsa í 17 ríkjum Bandaríkjanna, eða fjórðungs þeirra vöruhúsa sem fyrirtækið starfrækir í Bandaríkjunum.
Daily Beast ræðir til dæmis við Jace Crouch, sem starfaði í vöruhúsi Amazon í Lakeland í Flórída, sem ber fyrirtækinu ekki fallega söguna. Lýsir hún því að starfa þar sem „helvíti á jörðu“. „Það getur tekið mjög á andlegu hliðina að gera sama hlutinn, mjög hratt, í tíu klukkustundir á dag – fjórum til fimm sinnum í viku,“ segir Jace.
Tekið er fram í umfjöllun Daily Beast að einhverjir starfsmenn hafi lýst andlegum veikindum áður en þeir byrjuðu að vinna fyrir Amazon. Aðstæður í vöruhúsunum hafi þó gert veikindin verri.
Hér má lesa umfjöllun Daily Beast.