Vígahnöttur sprakk með miklum tilþrifum þegar hann kom inn í gufuhvolf jarðar í desember síðastliðnum. NASA tilkynnti þetta eftir að hafa fengið fyrirspurn um málið frá bandaríska flughernum.

Svo virðist vera sem enginn hafi séð sprenginguna sem varð að vísu á nokkuð afskekktum stað, eða yfir Beringshafi skammt frá Kanchatka-skaganum í Rússlandi. Beringshaf er hafsvæði í norðurhluta Kyrrahafs, milli Alaska og Síberíu.

NASA hefur skoðað málið eftir að gervihnettir námu sprenginguna og komist að því að hún var býsna öflug. Þannig er talið að sprengingin hafi verið tíu sinnum kraftmeiri en sprengjan, sem varpað var á Hiroshima í síðari heimsstyrjöldinni, leysti úr læðingi.

NASA hefur biðlað til flugfélaga, sem áttu vélar á flugi á þessum slóðum, að hafa samband ef ske kynni að einhver hafi séð sprenginguna.

Sex ár eru síðan vígahnöttur sprakk yfir Chelyabinsk í Rússlandi. Það var tilkomumikil sjón sem fjölmargir sáu. Vígahnötturinn sem kom inn í gufuhvolfið í desember var þó stærri, að sögn vísindamanna, en talið er að aðeins tveir til þrír svo stórir komi inn í gufuhvolfið á hverjum hundrað árum að meðaltali.

Hér má sjá vígahnöttinn sem sást yfir Chelyabinsk árið 2013: