Maðurinn sem grunaður er um að hafa skotið á vegfarendur í hollensku borginni Utrecht í morgun heitir Gökmen Tanis og er 37 ára. Staðfest er að þrír eru látnir og níu særðir, þar af nokkrir alvarlega. Ekki liggur fyrir hvort um hryðjuverk hafi verið að ræða en margt þykir benda til þess.
Ekki liggur fyrir á þessari stundu hvort fleiri en einn byssumaður hafi verið að verki.
Lögregla birti mynd af Tanis á Twitter-síðu sinni, en talið er að myndin hafi verið tekin á eftirlitsmyndavélar í járnbrautalest í borginni, skömmu áður en Tanis lét til skarar skríða. Tanis er af tyrknesku bergi brotinn.
Lögregla hefur undanfarna klukkustund eða svo setið um hús í Utrecht, en talið er að Tanis sé þar inni. Húsið er nokkur hundruð metrum frá staðnum þar sem árásin var framin.
Lögregla hækkaði viðbúnaðarstig vegna hryðjuverkaógnar í fimm í morgun í Utrecht og nágrenni borgarinnar. Hafa íbúar verið hvattir til að halda sig innandyra meðan lögregla leitar árásarmannsins eða árásarmannanna. Skólar eru lokaðir, almenningssamgöngur liggja niðri og þá hafa moskur í borginni verið hvattar til að hafa lokað í dag.
Fréttin hefur verið uppfærð með tilliti til fjölda dauðsfalla og fjölda særðra.