Bandaríska matvæla- og lyfjaeftirlitið hefur gefið grænt ljós á markaðssetningu á nýju lyfi gegn fæðingarþunglyndi. Læknar segja að um byltingarkennda nýjung sé að ræða. Talið er að um fimmta hver móðir upplifi fæðingarþunglyndi eftir barnsburð.
Lyfið sem um ræðir verður markaðssett undir heitinu Zulresso. Það virkar hraðar en hefðbundin þunglyndislyf sem konur fá ávísað gegn fæðingarþunglyndi. Prófanir á lyfinu hafa gefið góða raun og sögðust konur sem tóku þátt í prófunum upplifa betri líðan innan einungis 24 klukkustunda.
Lyfið inniheldur gervihormón sem líkir eftir hormóni sem kallast Allopregnanolone. Líkami kvenna framleiðir Allopregnanolone og byggist magn þess upp eftir því sem líður á meðgönguna. Eftir barnsburð minnkar framleiðsla á hormóninu mikið og getur það valdið því sem í daglegu tali er kallað fæðingarþunglyndi.
Kimberly Yonkers, doktor í læknisfræði við Yale-háskóla, segist í samtali við NBC binda miklar vonir við lyfið.
Unnið er að frekari þróun lyfsins og sem stendur er ekki hægt að fá það í töfluformi þó það standi til. Að því er segir í frétt NBC munu konur þurfa að gera sér ferð á heilbrigðisstofnun, liggja þar inni í 60 klukkustundir, eða þar um bil, meðan lyfið er gefið í æð. Þá er lyfið dýrt, kostnaðurinn um 4 milljónir króna á hvern sjúkling, en framleiðandi lyfsins, Sage Therapeutics, segir að tryggingafélög muni dekka þann kostnað að stærstum hluta.
