Vopnaður maður sem hugðist ræna konu sem var að taka út peninga í hraðbanka á dögunum sýndi skömmu síðar að hann er ekki sálarlaus með öllu, ef svo má að orði komast.
Atvikið átti sér stað í borginni Heyuan í Kína þann 16. febrúar síðastliðinn. Ránið, eða ránstilraunin, náðist á eftirlitsmyndavélar en á upptökum má sjá þegar maðurinn kemur aftan að konunni þegar hún er að taka út peninga.
Konan hafði tekið út upphæð sem nam um 40 þúsund krónum. Maðurinn otaði hníf að konunni og bað hana að rétta sér peninginn – sem hún gerði. Því næst bað hann um að sjá kvittun konunnar en á henni sást hversu mikið var eftir á reikningnum.
Ræninginn sá að konan hafði tæmt bankareikning sinn og við það virðist einhver mannleg hlið hafa komið upp í ræningjanum. Hann lét konuna hafa peningana, glotti og gekk svo burt.
Maðurinn var þó handtekinn af lögreglu skömmu síðar fyrir tilraun til ráns. Hann á ákæru yfir höfði sér og þarf að líkindum að dúsa í fangelsi vegna málsins. Manninum hefur þó verið hrósað af netverjum í Kína enda hefði hann auðveldlega getað gengið á brott með fulla vasa fjár.