Yfirvöld í Hong Kong glíma við plássleysi eins og aðrar stórborgir víða um heim. Til að vinna bug á þessu vandamáli hyggjast yfirvöld reisa ógnarstóra eyju úti fyrir ströndum Lantau, sem er stærsta eyja Hong Kong-héraðs.

Verkefnið verður mjög viðamikið eins og gefur að skilja en um er að ræða rúmlega þúsund hektara sem yfirvöld hyggjast reisa. Þess má geta að einn hektari jafngildir tíu þúsund fermetrum. Til að setja stærðina í samhengi verður eyjan tæplega þrefalt stærri en Central Park í New York, að því er Guardian greinir frá.

Kostnaðurinn við verkefnið mun hlaupa á um níu þúsund milljörðum króna, ef áætlanir standast.

Mikill húsnæðisskortur hefur verið í Hong Kong á undanförnum árum og er húsnæði þar með því dýrasta á byggðu bóli. Stefnt er að því að framkvæmdir hefjist árið 2025 og fyrstu íbúarnir muni flytja á eyjuna árið 2032.

Samskonar gervieyjur hafa áður verið reistar, til dæmis hin fræga Pálmatréseyja úti fyrir Dúbaí. Kostnaðurinn við byggingu hennar nam 1.400 milljörðum króna.

Áætlanir gera ráð fyrir að allt að 260 þúsund íbúðir rúmist á eyjunni og því gæti íbúafjöldinn farið í rúmlega milljón manns, ef miðað er við 3-4 á hverju heimili að meðaltali.