Í nóvember verður árleg ráðstefna Flat Earth International Conference (FEIC) haldin í Texas í Bandaríkjunum. Þetta verður þriðja ráðstefna samtakanna. En á næsta ári er ætlunin að ráðstefnan verði haldin um borð í skemmtiferðaskipi og farið verði til Suðurskautsins. Það er kannski ákveðinn kaldhæðni í því einu að halda hana á skemmtiferðaskipi því þeim er stýrt út frá þeirri kenningu að jörðin sé hnöttótt og tækjabúnaði sem byggir á því, GPS staðsetningarkerfið góðkunna.
Samtök á borð við FEIC hafa sótt í sig veðrið á undanförnum misserum og fleiri hafa snúist á sveif með þeim. Töluverður hluti af starfi samtaka á borð við FEIC er að varpa fram samsæriskenningum og er þar vinsælt að halda því fram að NASA hafi sviðsett lendingar á tunglinu, þar hafi menn aldrei stigið fæti.
Það verður fróðlegt að fylgjast með ferðinni og hvort heimsendi sé við brún Suðurskautsins.