Indónesíska flugfélagið Garuda hefur afpantað 49 farþegaþotur frá Boeing af gerðinni 737 Max 8. Eins og kunnugt er hafa vélar af þessari gerð verið kyrrsettar um allan heim eftir tvö flugslys með skömmu millibili, annars vegar í Indónesíu í október síðastliðnum og hins vegar í Eþíópíu fyrr í mánuðinum.

Talið er að þessi tiltekna afpöntun Garuda sé sú fyrsta eftir að vélarnar voru kyrrsettar á dögunum. Vélarnar eru tiltölulega nýjar og enn á eftir að afhenda mikinn fjölda þeirra. Talið er að Boeing verði af gríðarlegum fjármunum vegna þessa, enda kostar hver vél tugi milljarða króna.

Í frétt Guardian er haft eftir Ikhsan Rosan, upplýsingafulltrúa Garuda, að ástæða afpöntunarinnar sé sú að ekki ríkir lengur traust í garð þessara véla. Boeing hefur að undanförnu unnið að uppfærslu á flugkerfi vélarinnar, hinu svokallaða MCAS-kerfi, sem á að koma í veg fyrir að vélarnar ofrísi.

Óvíst er hvaða áhrif þetta mun hafa á Boeing en eftir að tilkynnt var um kyrrsetningar vélanna lækkaði verð hlutabréfa í Boeing verulega.