Nú hefur sigur unnist á hryðjuverkasamtökunum sem kenna sig við Íslamska ríkið í Sýrlandi og síðasta landsvæðið, sem samtökin höfðu á valdi sínu, hefur verið frelsað. En það þýðir ekki að samtökin séu liðin undir lok.

Samtökin eru nú að skipuleggja mannrán og sjálfsvígsárásir í Evrópu í kjölfar ósigursins í Sýrlandi. Í umfjöllun The Sunday Times um málið kemur fram samtökin séu nú að koma upp svokölluðum „krókódíla-sellum“ í Sýrlandi og á Vesturlöndum til að „drepa óvini guðs“. Sellur sem þessar eru „sofandi-hryðjuverkamenn“ sem bíða aðeins eftir að vera „vaktir“ og látnir fremja hryðjuverk.

Miðað við bréf, sem samtökin hafa sent frá sér, þá er markmiðið nú að fá eins marga sjálfsvígssprengjumenn og hægt er og safna miklu magni vopna. The Sunday Times segir að áætlanir um þetta hafi fundist á hörðum diski sem liðsmenn Íslamska ríkisins skyldu eftir á vígvellinum í Sýrlandi.

Fram kemur á harða diskinum að samtökin eigi bandamenn sem vilja stuðla að tilurð kalífadæmis og séu reiðubúnir til hryðjuverkaárása í Evrópu.