Hann kemur fram í sænsk/norska spjallþættinum Skavlan um næstu helgi þar sem hann ræðir þetta. Þau ráð sem hann gefur fólki fela ekki í sér lyfjatöku eða ráðgjöf hjá sérfræðingum.
Þetta snýst um svefn segir Walker. Hann segir að hjá körlum sem fá ekki nægilega góðan svefn geti magn testósteróns í líkamanum orðið á við það sem gerist hjá körlum sem eru 10 árum eldri.
„Við vitum að fyrir hverja klukkustund svefns sem kona bætir við sig eykst kynhvötin um 13-15 prósent.“
Hann telur að nokkrar litlar og einfaldar breytingar hjá fólki geti skilað betri svefni og þar með meiri kynhvöt og áhuga á kynlífi.
Hann segir að oft sé það þannig að annar makinn trufli svefn hins, til dæmis með hrotum eða þá að hann hreyfi sig mikið í svefni. Hann leggur því til það sem hann nefnir „svefnskilnað“. Þá sefur fólk í sitthvoru herberginu eða sitthvoru rúminu. Með þessu geti fólk fengið betri svefn. Hann segir það rangt sem sagt er að ef fólk sofi ekki saman stundi það ekki kynlíf, það sé frekar á hinn veginn.
Hann telur að fólk þurfi átta klukkustunda svefn á hverri nóttu til að líkaminn og heilinn fái þá hvíld sem nauðsynleg er. Hann varar fólk við að drekka áfengi fyrir svefninn því það slíti svefninn í sundur og valdi því að fólk hvílist ekki eins vel. Þá ráðleggur hann fólki að draga úr kaffineyslu yfir daginn, kaffi trufli svefn.
