Ástæða aflýsingarinnar er að konurnar tvær, sem áttu að fara í geimgönguna, nota báðar sömu stærð af geimbúningi en aðeins einn búningur í þeirri stærð er tilbúinn til notkunar í Alþjóðlegu geimstöðinni þar sem þær eru núna við störf.
Anne C. McClain og Christina H. Koch áttu að fara saman í geimgöngu frá Alþjóðlegu geimstöðinni en þar sem aðeins er til einn geimbúningur, sem er tilbúinn til notkunar, í stærð medium í geimstöðinni verður McClain að láta sér nægja að fylgjast með út um glugga á meðan Kock og Nick Hague fara í geimgönguna. Annar búningur í sömu stærð er til staðar í geimstöðinni en ekki hefur verið endanlega gengið þannig frá honum að hann henti til geimgöngu.
Í geimgöngunni á að skipta um rafhlöður utan á geimstöðinni en þær sjá tilraunastofum um borð fyrir rafmagni. Þetta er margra klukkustunda langt verkefni og það þykir of áhættusamt að nota geimbúninginn, sem er ekki alveg tilbúinn, í svona langt verkefni.