TripAdvisor hefur útnefnt bestu áfangastaði heims fyrir árið 2019. Ferðavefurinn stendur á hverju ári fyrir verðlaunum fyrir bestu áfangastaðina, Travellers‘ Choice Awards, en niðurstöðurnar byggja á umsögnum notenda vefjarins.
Það er skemmst frá því að segja að London var í efsta sæti á listanum að þessu sinni, en hún var í öðru sæti í fyrra. London er einkar vinsæl meðal ferðalanga enda hægt að hafa margt fyrir stafni í þessari fjölmennu og fallegu borg. París, höfuðborg Frakklands, var í öðru sæti og Róm, höfuðborg Ítalíu, í þriðja sætinu. Í fjórða og fimmta sæti komu annars vegar gríska eyjan Krít og hins vegar Balí í Indónesíu.
Í umsögn TripAdvisor um London kemur fram að brúðkaup Harry Bretaprins og Meghan Markle hafi aukið áhuga ferðalanga á borginni til muna. Konunglegar skoðunarferðir, ef svo má segja, njóti vaxandi vinsælda meðal ferðalanga. Þá njóti borgin góðs af merkilegri menningarsögu, góðum veitingahúsum og fyrsta flokks verslunum og næturlífi.
Athygli vekur að stórborgin New York, sem í gegnum tíðina hefur verið hátt skrifuð hjá ferðalöngum, féll niður um þrjú sæti á listanum frá því í fyrra. Borgin er nú í 13. Sæti en meðal áfangastaða sem eru hærra skrifaðir hjá notendum TripAdvisor má nefna Phuket, Barcelona, Istanbul, Marrakech, Dubai, Prag og Siem Reap í Kambódíu.
