Sigur Tiger Woods, eins allra besta kylfings sögunnar, á Masters-mótinu í golfi á sunnudag var frábær fyrir Tiger og aðdáendur hans um allan heim. Hann var aftur á móti ekki eins góður fyrir veðbanka sem töpuðu svimandi háum fjárhæðum á sigri Tiger.
„Það er frábært að sjá Tiger koma til baka. En þetta er slæmur dagur fyrir William Hill – okkar stærsta tap í sögunni – en frábær dagur fyrir golfið,“ segir Nick Bogdanovich, framkvæmdastjóri William Hill-veðbankans.
Tiger hefur ekki átt sjö dagana sæla á undanförnum árum og voru liðin ellefu ár frá hans síðasta risatitli. Það voru þó margir sem höfðu trú á Tiger fyrir mótið ef marka má fjölda veðmála.
Einn sem tippaði á sigur Tiger fékk til að mynda 1,2 milljónir Bandaríkjadala, eftir að hafa lagt 85 þúsund dali undir fyrir mót á að hann myndi vinna. Það voru fleiri veðbankar en William Hill sem töpuðu. FanDuel tapaði hátt í 300 milljónum króna á sigri Tigers og svona mætti áfram telja.