Óhætt er að segja að athugasemd sem stærðfræðikennari drengs í 2. bekk skrifaði á verkefni sem drengurinn skilaði hafi dregið dilk á eftir sér. Nú hafa rúmlega sextán þúsund manns skrifað undir áskorun á netinu þess efnis að kennarinn, Alyssa Rupp Bohenek, verði rekinn.

Chris Piland, faðir drengsins, birti mynd af verkefninu og athugasemd á Facebook-síðu sinni og er óhætt að segja að myndin hafi farið víða. „Algjörlega ömurlegt. Hann svaraði 13 á 3 mínútum! Sorlegt,“ sagði kennarinn sem lét síðan fýlukall fylgja.

Sonur Chris er sem fyrr segir í 2. bekk en í bekknum eru 7 til 8 ára börn. Hann stundar nám við Valley View-barnaskólann í Archibald í Pennsylvaníu í Bandaríkjunum.

Í færslu sinni skrifaði Chris að Alyssa hafi verið dónaleg við þá feðga í allan vetur. Sagðist hann vera bálreiður yfir skilaboðunum sem biðu á verkefninu, enda ekki beinlínis uppbyggileg orðin sem þar voru.

Chris var ekki sá eini sem var hneykslaður því einhver stofnaði fyrrnefnda undirskriftasöfnun þar sem sextán þúsund manns hafa kvittað undir. „Það er engine ástæða til að niðurlægja barn á þennan hátt,“ sagði til að mynda einn sem kvittaði undir.

Skólayfirvöld rannsaka nú málið en skólastjórinn, Rose Minniti, segir að undirskriftarsöfnun muni engu breyta um ákvörðun skólans, hver sem hún verður. Tekið verði á málinu á faglegan hátt og þrýstingur frá samfélagsmiðlum muni engu breyta. „Við munum byggja allar ákvarðanir okkar á staðreyndum og sönnunargögnum,“ segir Rose.