Fyrir 22 árum flutti Eric Yuan frá Kína til Bandaríkjanna, nánar tiltekið til Silicon Valley í Kaliforníu. Hann kunni nánast ekkert í ensku en hann lét það ekki stöðva sig frekar en að honum hafði átta sinnum verið neitað um vegabréfsáritun áður en hann hafði loks í gegn að fá eina slíka. Hann var 27 ára og líklegast er óhætt að segja að hann hafi verið fullur eldmóðs því í dag eru eignir hans metnar á sem svarar til 340 milljarða íslenskra króna.

Þetta kemur fram í umfjöllun CNBC. Fram kemur að Yuan stofnaði fyrirtækið Zoom 2011. Það býður upp á lausnir á sviði fjarfundabúnaðar. Mörgum þótti hann ansi bjartsýnn því stór fyrirtæki á borð við Google og Skype voru fyrir á markaðnum og Zoom var því ekki spáð löngu lífi.

En áður en að þessu kom starfaði hann hjá WebEx þar sem hann vann að þróun fundarkerfis til notkunar á netinu. Hann fór ekki í enskukennslu heldur lærði af vinnufélögum sínum. Hann var síðan gerður að yfirverkfræðingi hjá WebEx sem síðan var keypt af Cisco. Yuan hætti hjá fyrirtækinu 2011 og stofnaði þá Zoom.

Hann á 20 prósent hlutafjár í fyrirtækinu sem hefur gengið vel að fóta sig á markaði. Á síðasta ári jókst velta fyrirtækisins um 118 prósent. Mikil vinna liggur að baki þessu árangri og Yuan lagði mikið á sig á fyrstu árum Zoom. Hann réði nokkra starfsmenn frá WebEx til sín. Viðskiptavinirnir voru ekki margir svo hann sá sjálfur um að finna nýja viðskiptavini og fá þát il að flytja viðskipti sín til Zoom. Hann notaði að sjálfsögðu Zoom fundarkerfið til að setja sig í samband við væntanlega viðskiptavini til að sanna fyrir þeim hversu gott kerfið væri.