Starfsmaður á búgarði einum í norðurhluta Kaliforníu rak upp stór augu á dögunum þegar hann gekk fram á gervifót sem klæddur var í bláan Nike-skó.
Fundurinn vakti talsverða athygli – jafnvel hroll – enda umræddur staður ekki beint fjölfarinn og ekki algengt að eitthvað finnist á landareigninni, hvað þá eitthvað þessu líkt.
Maðurinn sem um ræðir hafði samband við lögreglu og bað hana að koma á svæðið og kanna málið. Ef til vill hefði kannski eitthvað saknæmt átt sér stað.
En svo reyndist aldeilis ekki vera og átti málið allt sínar eðlilegu skýringar, ef svo má segja. Maður að nafni Dion hafði nokkru áður verið í fallhlífarstökki en svo óheppilega vildi til að hann missti fótinn í stökkinu. Þannig vildi til að hann lenti á umræddum búgarði.
Dion og félagar hans höfðu gengið um svæðið og leitað að gervifætinum en án árangurs. Að sögn lögreglu var Dion mjög ánægður að fá fótinn aftur enda kostar hann hátt í tvær milljónir íslenskra króna. Hann var ekki síður þakklátur fyrir það að fóturinn hafi ekki lent á neinum eða skemmt eitthvað. Það hafi verið fyrir mestu.