Minningarathöfn var haldin um þrjú dönsk börn sem létust í hryðjuverkaárásunum á Sri Lanka um páskana. Anders Holch Povlsen, eigandi Asos og Bestseller, og eiginkona hans, Anne, þökkuðu fyrir þann stuðning sem fjölskyldan hefur fengið undanfarna daga.
Hjónin áttu fjögur börn og létust þrjú þeirra; sonurinn Alfred og dæturnar Alma og Agnes. Þriðja dóttirin, Astrid, komst lífs af. Anders slasaðist sjálfur lítillega í árásinni.
Minningarathöfnin var haldin í bænum Brande í Danmörku í gær og þar las presturinn, Arne Holst-Larsen, skilaboð frá Anders og Anne.
Í skilaboðunum sögðu þau að andlát barna þeirra væri hrikalegt áfall en fjölskyldan ætlaði sér að standa saman í því sorgarferli sem fram undan er. Þá þökkuðu þau fyrir þann hlýhug og þann mikla stuðning sem fjölskyldan hefur fundið fyrir undanfarna daga.
Um sjö hundruð manns mættu í athöfnina og var sorgin áþreifanleg. Margir voru með kerti eða kyndla meðferðis og þá voru sálmar sungnir og farið með bænir.
Fjölskyldan var á Shangri-La hótelinu í höfuðborginni Colombo þegar tveir árásarmenn gengu inn á hótelið og sprengdu sig í loft upp.